昨天，就是903 forum妹妹的情書版的春茗大日子。
說是春茗，其實只不過是一般的fans club聚會而已，
難得一日可以就到時間出席，既然可以見到承恩和詠妍，
實在沒有不報名參加的理由呀～
這個山林道23號的門口，就是通往聚會地點的入口了。
目的地就是這個，二樓的音樂人家Musical Studio～ 上呀！
聚會時間定為14:00～17:00。
大家也比預定時間早到，
而意料之內的，詠妍和承恩遲到，
結果大家也無所事事的hea下hea下。
既然無野做，女生們開始攻擊forum罵戰參加者其中一位常客------森美仔。
所謂的攻擊，其實只是圍住佢影相，
有乜好影？唔知呀，佢又唔係特別靚仔......
不過最搞笑的是，森美仔反擊，
用手機影返佢地，點知影影下無電.......
唔係卦，Party都未開始喎...... =_=
這位默默工作的大叔，就是音樂人家的老細(應該係卦......)
至於有一部份男生，
才不會玩互拍這種無聊的行為，
索性三五成群聚賭一番。
感覺上出席的男生都比較成熟，
難怪party後女生們都上forum大呼男生們質素差！麻甩佬！
大約14:15，主角們到場了，
把大家的目光一下子全都吸引過去～
兩位搞手糖糖和Cheryl也一併負責MC工作，辛苦晒喇～
「大家坐埋D！輪流自我介紹一下！」
好緊張，到我自我介紹了！
「我係大豪丸邪鬼......」
點知詠妍和承恩齊聲說：「原來就係你！」
喂...... 駛唔駛咁大反應呀....... =_=
介紹完後，又叫大家講講自己網名的由來。
又講完，就開始食野.......
食物質素......
我只可以說，如果只是用來充饑的話，是可以接受的。
食到咁上下，開始玩遊戲了(唔好啦，我幾十歲人唔想玩喎......)。
玩乜野呢？
第一：世界之最
第二：收買佬
第三：感性之夜之forum後現代新詩王大賞選舉2008
原來也不止我一人是自閉仔，
基本上所有男生都唔係太願意玩......
太好了，有人陪！
誰知詠妍一聲令下：
「男仔都要玩！你地唔分組，我同你地分！呢四個一組，另外呢幾個一組。」
分啦分啦～反正我堅持唔玩，仲有其他組員玩～
開始玩喇！男生們都係唔願郁......
「大豪！出來！」
下？點解指明要我玩呀？
詠妍，妳唔好玩我啦～
好！我比面妳，我出來玩......
上圖呢位正在玩遊戲的靚仔，大有來頭：
佢，一舉手，會令少女們興奮尖叫！
佢，一投足，會令少女們舉機拍攝！
佢，一切一切，都令詠妍和承恩讚不絕口！
佢，正是迷倒妹妹版萬千少女的神秘版主------小富。
終於玩完遊戲，送晒獎品，
係時候到fans們最期待的簽名影相時間喇！
其實我好懷疑，詠妍和承恩會唔會樂在其中呢？
呢樣好似係佢地平日工作的一部份喎。
我還是自閉在一邊吧......
年紀大了，實在不習慣跟小朋友迫埋一齊問偶像拎簽名......
呢個時間，最好就係偷拍一下其他人喇～
開場前大家最想影的森美仔，而家企定定比我偷拍喇～
Wahahahahaaaaaaaaaaa~~~~~~~~
老細其實都幾休閒喎，我見佢上網睇賠率。
（影到個鐘喎，大約16:20，就快完場喇！）
諗住打發時間，同cwt吹左幾句水，
點知吹吹下，發現佢好似吹到唔想停，
算啦，都係拎部相機行埋去人群之中好過......
唔知詠妍係唔係見到我迫唔到埋去影相，
影影下佢見到我，突然彈出一句：「我要同大豪影！」
真係受寵若驚，如果唔係妳咁講，
我真係無機會同妳地合照～多謝妳呀～詠妍～
（亦都唔該晒版主小富幫手揸機影相～）
小富真係一舉手一投足都吸引大家的目光，
佢一話要同詠妍承恩影合照，即刻有十幾部相機一齊影！
見到呢個情境，連我都忍唔住影埋一份！
影到咁上下，詠妍和承恩就分開兩邊，
同fans們one on one影合照～
咦！承恩就站在身旁，偷拍一張吧......
(oh，sorry，影得妳有點肥......)
之後，承恩就要履行之前玩遊戲送出的獎品，
給感性詩人兼forum rum草------艾石，來一次塔羅占卜。
(很羨慕呢，可以跟承恩單獨相處）
最後當然就是來一張大合照吧～
一不離二，影多一張～
（老實說，大部份人我都唔記得邊個打邊個......)
影完大合照，大約五點十五分，散場！
因為之前自閉時飲了很多花茶，所以離場時去一去廁所，
點知，點解塊廁板濕晒架？唔通有人洗完手fing濕晒？
定係有女生痾到塊板濕晒？定抑或有男生去廁所唔拎起塊廁板咁缺德？
在我之前去廁所的是....... 我記得了，不過都係唔講喇～
臨走前，等電梯時，終於有機會跟詠妍one on one對話喇，
佢仲讚我上次送比承恩隻Pinky好靚呀～
本來我想話：「下次整隻比妳啦！」
不過都係硬生生將呢句野吞回，呢排太忙，都係唔好亂誇下海口，
況且，留返個quota，下次比個驚喜佢仲好啦～
以下是對今次Party的一點個人意見......
其實今次呢個party都算搞得幾好，雖然偶有悶場，但秩序良好，
加上大家不太熟絡，所以有部份人玩遊戲時不太投入，
下次如果要玩，就叫詠妍和承恩點名叫人出來玩(好似我咁.......)，
這樣就可以避免無人肯玩的情況。
可以的話，下次多給詠妍和承恩說話，
例如叫她們說說對forum上的網友們的感想，
說說某些人做了甚麼，令她們留有深刻的印象，
總好過叫人自己講一些東西來加深自己在詠妍和承恩心目中的印象，
始終大家還是比較有興趣認識多一點咪後的詠妍和承恩唷～
希望下次我也可以抽到時間參加吧～
稍為可惜的是，找不到太多的機會跟詠妍和承恩談話呀～
沒有留言:
張貼留言