0930 中島愛 超時空演唱會香港站

2010年9月30日，超時空要塞Ｆ的其中一位歌姬－－中島愛，
於九龍灣國際展貿中心舉行「中島愛 超時空演唱會香港站」。

我早已買了價值$450的門票，
第六行中間位置，雖然已經是很好的位置，
不過如果係路口位會更好。

「中島愛超時空演唱會香港站」呢個中文名好像怪怪的，
還是原名「中島愛Premium live in Hong Kong」比較順耳。

演唱會在三樓的演講廳舉行，
呢個場好細，不過幾好坐～

門票只有兩種，分別是$450.......

和$350......

雖然門票有劃位，但唔知點解好多人一早就來排隊......

當中更有cosplayer～

場外有一個位置放了最新一期Anisong Headline，
供大家排隊時悶悶地可以用來消磨時間～

同時亦提供一張會員申請表格，
可以即場加入成為Anisong in Asia的會員。

舞台沒有甚麼特別佈置，只有幾條柱、幾盞燈......

紀念品於下午五時開賣，
不過我事前無留意呢個消息，
所以七時左右才到場，結果乜都買唔到...... >_<

演唱會雖然原定8:15pm開始，
但結果差不多要到8:45pm才開始，
而完場時大約10:45pm。

演唱會主要以Macross的歌為主，
不過我其實唔係太鐘意佢唱Macross的歌，
因為佢用蘭花腔來唱歌，實在不太好聽......
而佢自己個人大碟入面的歌，好聽好多！

我其實比較想佢唱個人大碟《I Love You》內的歌，
尤其是《Sunshine Girl》，仲以為呢首一定會唱，點知都係無......

當中有一段問答時間，司儀聲稱想令大家多點了解中島愛，
但呢個問答環節真係太長喇！應該有十五分鐘以上。

問答環節大致內容如下：

1/ 當初如何得到蘭花呢個角色？

十三歲開始已參加過很多類似的選秀會，
但全部落選，直至高中最後一年，打算參加最後一次，
而那次就是Macross 25週年紀念作的招募，
最後卻成功得到這個角色～

2/ 對香港有何感想，有沒有去甚麼地方玩？

香港的大廈很高，在日本的大廈好像很易看到屋頂，
但香港的大廈卻很難。去了旺角、女人街，朗豪坊，
買了很多東西，也嘗試過龜苓膏～

3/ 對河森正治監督有甚麼感覺？

河森監督是一個很健談的人，有空時更會替人解夢，
而且很喜歡看雀鳥，更會追著天上的雀鳥來跑，
此外，她覺得河森監督很能捱冷，
天寒地凍都可以只穿一件Tee恤......

4/ 為《Macross F電影版》配音時，有何趣事？

連續十五小時為電影配音，令大家都變得十分投入角色，
完全進入興奮的狀態，甚至有人弄跌筆或有人開門，
這些芝麻綠豆的小事都會令他們大笑起來。

全晚只係唱左14首歌，
我估係因為要預留時間俾之後的全場握手會，
握手會完結時，都已經差不多11:30pm了......

當中的《ニンジーン Loves you yeah!》，
更是廣東話version！不過佢因為唔係太熟，
所以唱到中途忘記了廣東歌詞，
連聲道歉後，更清唱多一次，
實在是很可愛～

以前我成日覺得佢扮可愛，
但經過今晚，我覺得佢真係好可愛～
佢而家在我心目中地位，大大提升了！

Encore前的一首歌，是蘭花的代表作《星間飛行》，
我一早已經背晒成首歌的舞步，所以當中島愛演唱時，
我可以跟著她一齊跳，不過我只係企響自己個位跳......
而家有少少後悔，既然我咁辛苦背晒成首歌的舞步，
其實應該不顧一切行出路口跳，反正我個位距離路口，
只係相差兩個位，最多被人叫返埋位時會比樣衰少少......

演唱會的rundown：

1. 天使になりたい
2. What’bout my star @ Formo
MC 1
3. ニンジーン Loves you yeah! -Hong Kong ver.-
4. 私の彼はパイロット
MC 2
5. ねこ日記
6. ジェリーフィッシュの告白
MC 3 -問答環節與嘉賓中國籍結他手-宋睿登場-
7. わたしにできること (acoustic)
8. アイモ – 鳥の人 – (acoustic)
9. 蒼いエーテル (acoustic)
MC 4
10. アナタノオト
11. 星間飛行

ENCORE
12. ライオン – ランカver. -
13. 「超時空飯店 娘々」 CMソング (臨時加插的清唱版)
14. 愛．おぼえていますか

本來以為不太多人有興趣睇中島愛，
因為我公開發售第二日，我上網仍能買到第六行中間，
跟上次May'n相比，可謂差天共地，但現場看來，
入座率應該有七成，算不錯了吧！

完場後，只是去了一個廁所，
回來時已見排隊參加握手會的人，
已經多得打了幾個蛇餅......

握手會由10:45pm開始排隊，
到我行到握手會會場門口拍這張照片時，已經11:15pm！

握手會中，當下一個就輪到我時，
剛好電話響，快快手熄左個電話之後已經輪到我，
被個電話搞一搞，原本諗定晒想講的說話突然失憶，
結果噫噫呀呀左幾聲，就求其講左一句Kawaii.......
真係好失敗...... 不過仍然成功將禮物送到佢手上～
(禮物係乜？唔講喇～)

不過，佢對手真係好滑呀～

而且佢真係好熱情，緊緊的捉著大家的手，
有不止一人說過：「佢捉住我對手好耐，我想放佢都未放！」
難怪大家握完手之後都一臉滿足的離開～

說起來，繼飯島真理和May'n之後，
如今連中島愛的手都握了，超時空歌姬們的手，
幾乎已經被我「完全制霸」了呀！

10月2-3日，中島愛將會到廣州的ACG展獻唱，
所以估計佢今晚或明早便會由香港出發到廣州，
由於班次太多，實在很難估佢幾時出發，
所以想送佢走的朋友，可以死心了......

最後想講，今次實在唔係好夠喉，
只得十四首歌，當中更只有少數是她個人的歌，
按照中島愛在演唱會尾段講過：「I will be back!!!」
我希望快點成真吧！期待佢再次來香港演出～

不過有人話最好佢同May'n一齊來，
我反而想佢兩個分開來，因為我不太想佢地一人一半，
分薄晒大家的表演時間呀～